Misupak ang National Citizens’ Movement for Free Elections (Namfrel) sa sugyot nga i-postpone ang eleksyon sa Barangay ug Sangguniang Kabataan (BSKE), nga gikatakdang ipahigayon sa Nobyembre 2.
Sa usa ka pahayag, ang election watchdog miingon nga ang pag-postpone sa lokal nga eleksyon usa ka seryosong hulga sa pundasyon sa demokrasya sa nasud ug kinahanglan nga i-basura dayon ang sugyot.
Sumala sa Namfrel, ang BSKE dili usa ka “discretionary event” o opsyonal nga kalihokan nga kinahanglan i-postpone alang sa kaayohan sa mga anaa sa gahum. Hinuon, kini usa ka obligasyon sa konstitusyon ug demokratikong katungod sa katawhang Pilipino.
Gipahayag usab sa grupo nga ang pag-divert sa pondo alang sa pagpangandam sa lokal nga eleksyon ngadto sa ubang mga serbisyo sa gobyerno usa ka dayag nga buhat sa “institutional sabotage.”
Giinsistir sa Namfrel nga ang matag botante kinahanglan hatagan og katungod sa pagpili sa ilang mga opisyal sa barangay ug SK nga regular ug walay paglangan.
