Gibasura sa Appeals Chamber sa International Criminal Court (ICC) ang upat ka mahinungdanong apela sa kampo ni kanhi Presidente Rodrigo Duterte gahapong adlawa, Abril 22, 2026.
Tungod niini, pormal nang gihuptan sa korte ang ilang hurisdiksyon sa pagpadayon sa kasong Crimes Against Humanity batok kaniya, bisan pa man sa sige’g insister sa iyang mga abogado nga wala nay gahum ang ICC tungod sa pag-withdraw sa Pilipinas kaniadtong 2018.
Kini nga desisyon nagpasabot nga naupos na ang legal nga mga lusot ni Duterte aron unta mapahunong ang imbestigasyon mahitungod sa madugayong “War on Drugs.”
Samtang nagpabilin siya sa detensyon sa The Hague, ang maong ruling nagsilbing pultahan alang sa sunod nga lebel sa proseso, diin tutukan na sa korte ang pagtimbang sa mga ebidensya alang sa nagkaduol nga trial o pormal nga husay sa kaso.
Subay niini, eksklusibong gikuha sa Bombo Radyo Cebu news team ang habig ni Atty. Rameses Victorious Gatchalian Villagonzalo, usa ka ICC Accredited Lawyer, aron isuta kung unsa usab ang iyahang ikabutyag kabahin niini.
Matod ni Atty. Villagonzalo, basi sa iyahang nakita ingun man nakita sa kadaghanan kay usa lang ka “summary.”
Dugang niya nga basi usab sa iyahang pag-analisar sa milabayng buwan pa, ang gipang-raise normal lang sa habig sa depensa, nga walay jurisdiction sa kaso, ug ingun man ang gitawag nga complementarity, diin gitataw niini nga adunay korte sa nasud (Pilipinas) nga mamahimong modala sa maong kaso.
Samtang gitino usab niini ang ika-upat nga apela kinsa gibasura usab sa Chamber I, diin mao ang “improper investigation.”
Matod niya, gideklarar ang tanan bahin sa substantibo ug proseso nga aspeto sa tanang mga kaso.
Samtang, gihisgutan usab ni Atty. Villagonzalo, nga atol sa pag-discuss ni International Criminal Court Presiding Judge Luz del Carmen Ibáñez Carranza, sukad sa pagsugod sa primirong ground sa jurisdiction, mahimadlan na nga ubang punto sa pag-apela, gituohang ma-reject na, gumikan kay sa jurisdiction palang daan giklaro na nga ang mga gibasehan nga crimes naglakip sa panahon niadtong Nobyembre 2011 hangtud Marso 16, 2016.
Dugang pa, nga sa maong panahon, wala giapil ang mga period hangtud sa katapusang adlaw sa Duterte Presidency, nagpasabot nga Marso 17, 2019 hangtud Hunyo 30, 2022 ang wala malakip.
Busa sa hurisdiksyon palang, masunod gihapon ang period bisan pag ni-withdraw ang Pilipinas niadtong 2019.
Samtang sa subject matter nga nag-ingung dili “crimes against humanity,” gitubag usab kini sa summary nga ang katong mga patay widespread ug systematic.
Giklaro ni Atty. Villagonzalo, nga kini basi upat ka mga napresentar nga rason sa habig ni Duterte, gibasura kini sa Appeals Chamber, diin ang epekto ani ngadto sa kanhi presidente, daogonon pa ang confirmation of charges decision niini.
