Gipasalig sa legal team ni kanhi Presidente Rodrigo Duterte nga ilang pamatud-an sa pagdungog sa International Criminal Court nga “complete fiction” o “hingpit nga hinimo-himo” ang alegasyon nga ang gobyerno adunay direktiba sa pagpatay sa mga suspek ilalom sa war on drugs.
Sumala ni defense counsel Nicholas Kaufman, ang kaso sa prosekusyon nagbase lamang sa mga saksi nga giingong walay kredibilidad.
Gibatikos usab niya ang desisyon sa ICC Pre-Trial Chamber I sa pagkumpirma sa mga kaso sa krimen batok sa katawhan, nga naglakip sa murder ug attempted murder batok sa kanhi presidente.
Gipasabot ni Kaufman nga ang kredibilidad sa mga saksi sa prosekusyon wala pa hingpit masusi sa confirmation hearing.
Gisaway usab sa depensa ang giingong posibleng mga benepisyo alang sa mga saksi baylo sa ilang testimonya, lakip ang immunity gikan sa mga kaso ug paghatag og bag-ong identidad gamit ang pondo gikan sa international community.
Gibarugan sa abogado nga ang ebidensya nga gipresentar sa mga kritiko ni Duterte walay gibug-aton.
