Gibisita sa mga sakop sa Armed Forces of the Philippines (AFP) ang Sugbo, alang sa pagsiguro sa kahugot sa siguridad atol sa ipahigayong Association of Southeast Asian Nations (ASEAN) Leaders Summit sa umaabot buwan sa Mayo.
Matud ni General Romeo Brawner Jr. ang Chief of Staff sa Armed Forcers of the Philippines, nga iyang gibisita ang mga nagkalain-laing venue sa Summit aron susihon kung andam na ang lugar nga pahigayonan sa maong kalihokan.
Gikalipay niini nga nakita ang venue nga andam sa bisan unsang matang sa hulga sa siguridad ug gihumug-atan nga kumpiyansa siya nga sa pag-abot sa mga delegado, luwas og hapsay ra ang ilang pag-abut sa Sugbo.
Sigon usab sa heneral nga mag-deploy sila og liboan ka mga sakop sa AFP, Philippine Air Force, Philippine Navy ug mga sakop sa kapulisan, lakip na usab ang pag-deploy sa Navy Ships samtang naka-standby usab ang mga nagkadaiyang aircrafts alang sa posibleng motumaw nga emerhensiya.
Gihimug-atan usab ni Brawner, nga ang tanan nga mga delegado lakip na ang mga lideres sa nagkadaiyang nasud nga hapsay ug luwas nga makatambong sa ASEAN Summit.
Samtang, wala usab nasuta nga mga hulga sa siguridad sa Sugbo, taliwala sa nahitabong engkwentro sa Toboso, Negros Occidental nga nakakalas og 19 gitouhang miyembro sa New Peoples Army.
