Gipanghimakak sa Iranian Oil Terminals Company ang mga taho nga adunay pagtulo sa lana o oil leak duol sa Kharg Island, usa sa mga sentro sa eksportasyon sa crude oil sa Persian Gulf.
Ang mga taho mibutho human sa mga satellite imagery nga nagpakita og dakong oil slick sa dagat sa kasadpang bahin sa isla sa miaging mga adlaw, nga nakapukaw sa kabalaka sa posibleng environmental impact.
Apan sumala sa chief executive sa kompanya, gihimo nila ang komprehensibong inspeksyon sa mga storage tank, pipeline, loading facilities, ug tanker sa lugar, ug wala silay nakitang ebidensya sa bisan unsang oil leak.
Gipahayag usab nga ang Marine Emergency Mutual Aid Center (MEMAC), usa ka regional marine pollution monitoring body, wala usab nakarekord og insidente sa oil spill sa maong lugar.
Dugang pa sa kompanya, ang ilang mga field ug laboratory testing nga gihimo human sa mga taho wala usab nakit-an bisan gamay nga timailhan sa pagtulo sa lana.
