Nagpadala ang Iran og proposal ngadto sa Estados Unidos, pinaagi sa tigpataliwala nga Pakistan, nga nagtumong sa pagtapos sa gubat sa Middle East.
Sa proposal niini, gipangayo sa Iran ang pagtangtang sa mga silot sa US Office of Foreign Assets Control (OFAC) sa pagbaligya sa lana sa Iran sulod sa 30 ka adlaw ug ang pagtapos sa pagbabag sa kadagatan sa US sa mga pantalan niini.
Sumala sa mga taho, ang hangyo sa Iran naglakip sa pagkontrol sa Strait of Hormuz kung ang US motuman sa mga piho nga pasalig, nga wala gitino.
Apan, si US President Donald Trump, pinaagi sa iyang plataporma sa Truth Social, kusganong misupak sa kontra-proposal sa Iran ug matud niini “totally unacceptable” o hingpit nga dili madawat ang mga gilatid nga kondisyon.
Nagpasidaan usab ang Iran nga dili kini magduha-duha sa pagbalos batok sa bisan unsang bag-ong pag-atake sa Amerika ug dili motugot sa pagpadala sa dugang nga mga barkong panggubatan sa langyaw sa Strait of Hormuz.
Sa usa ka pahayag, gipasiugda ni Iranian President Masoud Pezeshkian nga dili sila moyukbo sa kaaway, ug nga ang diyalogo o negosasyon wala magpasabot sa pagsurender o pag-atras.
