Gipasiugda ni President Ferdinand Marcos Jr. ang kamahinungdanon sa integridad, disiplina, ug dungog sa serbisyo publiko atol sa iyang mensahe ngadto sa mga bag-ong kadete, diin iyaha kining gihagit nga magpabiling matinud-anon sa Konstitusyon ug sa katawhang Pilipino.
Sa iyang pakigpulong, giingon ni Marcos nga ang pagkamaunongon sa mga sundalo kinahanglan ipakita ngadto sa Konstitusyon sa Republika sa Pilipinas ug dili sa bisan unsang interes sa politika, personalidad, o temporaryong ideolohiya.
Giawhag usab sa Presidente ang mga kadete nga isabuhay ang prinsipyo nga “never lie, never cheat, never steal, and never tolerate those who do,” ug gipasiugda nga ang pagpiyong o pagpakahilom sa sayop nga binuhatan maituturing nga pagbudhi sa ilang gipanumpaang katungdanan ug mga prinsipyo.
Gipahayag usab ni Marcos ang iyang pagsalig sa abilidad ug pagkamaunongon sa mga gradwado sa pag-alagad sa katawhang Pilipino ug sa Inahang Yutang natawhan uban ang tibuok nilang kasingkasing.
Sumala sa Presidente, samtang magpabilin nga matinud-anon ang mga sundalo sa bandila ug sa katawhan, dili sila mawad-an og direksyon sa pagtuman sa ilang mga katungdanan isip mga tigpanalipod sa nasud.
