Posibleng mausab na usab ang liderato sa Senado karong Lunes sa pagsugod sa sesyon, human ibutyag ni Senate President Alan Peter Cayetano nga adunay giingong lihok aron mapahawa siya sa puwesto.
Sa press conference, giingon ni Cayetano nga adunay giplanong “kudeta” batok sa iyang liderato.
Matod niya, adunay pipila ka mga senador nga gikumbinser nga mobalik sa minority nga grupo nga gipangulohan ni Senate Minority Leader Vicente “Tito” Sotto III. Iya usab giingong adunay giingong “pagpanghadlok” sa ubang senador aron mobalhin og kampo.
Sa kasamtangan, posible nga mokunhod ang suporta kang Cayetano tungod kay si Senador Ronald “Bato” dela Rosa gilauman nga dili motambong sa sesyon. Si dela Rosa gikatahong mibiya na sa Senado niadtong Huwebes sa buntag.
Kung mahitabo kini, mahimong moubos sa 12 ang mga senador nga mosuporta kang Cayetano isip Senate President.
Kahinumdoman nga 13 ka senador ang mibotar aron ihalal si Cayetano sa maong posisyon,ug siyam ang misuporta kang Sotto. Samtang sila si Sen. JV Ejercito ug Sen. Juan Miguel Zubiri nag-abstain sa botohan.
Kung modapig sa minorya ang duha ka nag-abstain ug adunay duha pa ka senador gikan sa kasamtangang mayorya nga mobalhin og suporta, mahimo silang makaporma og bag-ong “Magic 13” nga igo aron makapausab na usab sa liderato sa Senado.
