Hugot nga gikondenar sa Presidential Task Force on Media Security (PTFOMS) ang pagpatay kang Nestor Micator, 56, usa ka news anchor ug komentarista sa usa ka local radio station sa Pikit, Cotabato.
Subay sa imbestigasyon sa kapulisan, ang biktima pauli na uban sa iyang asawa sakay sa usa ka motorsiklo human namalit og pagkaon sa Poblacion area sa Pikit, Cotabato, sa dihang mga 50 metros na lang ang gilay-on niini gikan sa ilang balay.
Pag-abot nila sa maong dapit, gipusil si Micator sa ulo sa duha ka armadong lalaki nga nagsakay usab og motorsiklo.
Sa usa ka pahayag ni Executive Director Jose Torres Jr., ang PTFOMS miingon nga ang krimen kinahanglan nga imbestigahan dayon ug ang mga anaa sa likod niini kinahanglan nga manubag sa balaod.
Dugang sa PTFOMS nga ang bisan unsang kapintasan batok sa mga tigbalita usa ka hulga dili lamang sa kagawasan sa prensa, apan lakip usab sa katungod sa publiko sa impormasyon.
