Gipasabot ni Johann Tejada, ang tigpamaba sa Bureau of Fisheries and Aquatic Resources-7, nga ang mga nikatap karon sa social media kabahin sa nahitabo sa Lungsod sa Oslob, Cebu, diin nabatyagang wala mitumaw ang mga butanding o mas naila nga whale shark sa pipila na ka mga adlawng nilabayng.
Atol sa eksklusibong pakighinabi sa Bombo Radyo Cebu ni Tejada, iyahang gitino nga ang butanding mao ang klase sa mananap nga cold-blooded. Nagpasabot nga magpangita gayud kini og bugnaw nga lugar.
Apan gumikan sa nasinating kainit sa panahon sa kasamtangan, busa possible gayud kining mga butanding nga mopa-ilawom og maayo kay magpabugnaw, o ba kaha mo bakwit o mobalhin kinig laing lugar nga adunay kabugnawon ang temperatura.
Dugang pasabot ni Tejada, ang mga whale shark sulod sa matang nga migrating species, busa gikinahanglan niining mo bakwit o mobalhin para mokaon, mopabugnaw, ug mo reproduce.
Busa, kung ang temperatura sa kadagatan dili compatible sa tulo ka matang nga gikinahanglan niini, mao na kini ang higayon nga mobakwit kini.
Bisan paman sa maong panghitabo, hinuon gihatagan og katin-awan ni Tejada nga ang kasamtangang absence sa mga whale shark sa Oslob, dili nagpasabot nga hangtud sa hangtud na kini.
Gumikan kay matod niya, aduna gayuy panahon nga mobalik ra gayud kini sa kung asa kini gagikan, kay basi sa mga taho sa nagtuon kabahin sa whale shark sa Oslob, nagtuyok-tuyok ra kini sa Probinsya sa Bohol, Cebu, ug Leyte.
Busa gikabutyag ni Tejada nga possible ra gihapon nga nag balhin-balhin ra kini tungod kay gikonsiderang “playground” naman niining mga matang sa hayop ang kadagatan sa Central Visayas.
