Nag-isyu na ang Sandiganbayan og Precautionary Hold Departure Order (PHDO) batok kang Senador Rodante Marcoleta, kanhi kongresista Mike Defensor, ug duha pa ka opisyal nga may kalabotan sa kasong plunder ug indirect bribery base sa mga nahibal-an sa Office of the Ombudsman.
Ang 7th Division sa anti-graft court nag-isyu sa PHDO niadtong Martes, Mayo 26, nga naglakip usab nila ni Joseph Varias Espiritu ug Aristotle Baluyut Viray.
Sumala sa imbestigasyon, ang kaso may kalabotan sa giingong mga donasyon sa kampanya nga mokabat sa P75 milyon nga nadawat ni Marcoleta gikan sa mga kaubang akusado.
Basi sa report, ang Office of the Ombudsman nagsang-at og hangyo alang sa PHDO niadtong Mayo 25, usa ka adlaw sa wala pa kini gi-isyu sa korte.
Ang PHDO temporaryong nagdili sa usa ka indibidwal sa pagbiya sa nasud samtang gisusi ang kaso, bisan kung wala pa’y pormal nga mga kaso nga gisang-at sa korte.
Girekomendar sa mga imbestigador sa Ombudsman ang pagpasaka og kasong plunder ubos sa Republic Act 7080 ug paglapas sa Presidential Decree No. 46, nga nagdili sa pagdawat og mga regalo sa mga opisyal sa gobyerno. Girekomenda usab ang mga kaso sa indirect bribery batok kang Marcoleta.
Gibutyag sa imbestigasyon sa Commission on Elections nga si Marcoleta giingong wala modeklarar sa mga donasyon sa kampanya sa iyang Statement of Contributions and Expenditures.
Nasayran nga ang P75 milyon giingong gipadala sulod sa upat ka adlaw niadtong Enero 2025 gikan nila ni Defensor, Espiritu, ug Viray.
