Mipasaka og kasong perjury ang progresibong non-governmental organisasyon nga Community Empoweement Resource Network Inc. o CERNET batok kang AFP Brigadier General Joey Escanellas, witness sa militar nga si Bernabe Nieves, ug state prosecutor Peter Ong, may kalabot sa kasong terrorism financing na na-dismiss batok kanila.
Kini gumikan sa depektibong mga bank statements nga gihimong ebidensya nga naga suporta ang CERNET sa grupong New People’s Army, hinungdan nga gitinong front ang maong grupo sa armadong grupo.
Matud pa ni Jhonggie Romul, kanhi staff sa CERNET, sa eksklusibong pakighinabi sa Bombo Radyo Cebu kaniya, nga bakak ang mga alegasyon batok sa maong grupo diin sila midasun nga ang CERNET usa ka lehitimong grupo na nagatabang sa mga kabus na napasagdaan sa gobyerno sama sa mga mag-uuma, mangingisda, ug uban pa.
Dugang pa, ang kasong terrorism financing nakabalda sa operasyon sa maong grupo ug nakamugna kini og hulga sa kinabuhi sa mga miyembro tungod sa redtagging.
Gahapon sa hapon, Mayo 26, gipahigayon ang preliminary hearing sa kasong perjury didto sa Department of Justice Region-7, diin gipagatambongan kini sa mga miyembro sa CERNET ug subay niini, midagsa ang mga miyembro sa mga progresibong pundok sa Sugbo aron sa pagpahigayon og protesta aron pagpakita sa suporta sa maong organisasyon.
