Mikunhod og 23.59 porsyento ang mga insidente sa dalan sa lalawigan sa Cebu sulod sa unang lima ka bulan ning tuiga, kini base sa datos sa Cebu Police Provincial Office, nga anaa sa 2,728 ka road incidents nga natala gikan Enero hangtod Mayo 27, 2026, kumpara sa 3,570 ka kaso sa samang panahon niadtong 2025.
Sumala ni Police Lieutenant Colonel Jose Rovic Villarin, deputy Provincial Director for operations sa CPPO, ang maong pagkunhod resulta sa gipakusog nga checkpoint operations, mas daghang police visibility, ug padayon nga kampanya sa road safety ug crime prevention.
Sagad sa mga insidente may kalabotan sa damage to property nga miabot sa 1,671 ka kaso, samtang 970 ang physical injury cases.
Taliwala niini, misaka ang mga kaso sa reckless imprudence resulting in homicide gikan sa 69 ngadto sa 87 ka kaso, o kapin 26 porsyentong pagsaka kumpara sa miaging tuig.
Matud ni Villarin, nagpadayon gihapon ang ilang mga operasyon aron mas mapalambo pa ang kaluwasan sa mga motorista ug pasahero sa tibuok lalawigan.
Mikunhod usab ang mga insidenteng nalambigit sa motorsiklo gikan sa 1,193 ngadto sa 1,081 ka kaso.
Gipunting sa opisyal nga usa sa mga hagit karon mao ang pagsaka sa paggamit sa motorsiklo human sa pagbalik sa klase, tungod kay daghang estudyante ang nagsalig niini isip transportasyon.
Giawhag ni Villarin ang tanang motorista nga mag-amping sa pagbiyahe ug magpakita og disiplina sa dalan aron malikayan ang pagkawala sa kinabuhi tungod sa aksidente.
