Mihangyo ang abogado ni kanhi Presidente Rodrigo Duterte sa International Criminal Court (ICC) Trial Chamber III nga susihon pag-usab ang 81-anyos nga kanhi presidente aron mahibal-an kung angayan pa ba siyang moatubang sa husay sa usa ka kaso nga crimes against humanity.
Sa pito ka pahina nga pleading nga gipetsahan Mayo 25, ang defense counsel nga si Peter Haynes miingon nga ang miaging medical assessment gihimo lamang sa pre-trial stage, busa kinahanglan nga susihon pag-usab ang kondisyon sa kanhi presidente samtang nagkaduol ang pormal nga husay.
Ang depensa nangatarungan nga ang korte adunay obligasyon nga susihon pag-usab ang kaangayan sa pag-atubang sa husay matag 120 ka adlaw o kung hangyoon sa bisan kinsang partido, aron masiguro ang katungod sa akusado sa usa ka patas nga husay.
Dugang nga gipasiugda ni Haynes nga ang korte mahimong magmando og bag-ong medikal, psychiatric, o psychological evaluation base sa ICC Rules.
Sa usa ka naunang status conference niadtong Mayo 27, ang ICC Trial Chamber III Presiding Judge nga si Joanna Korner miingon nga ang korte magmando og usa ka pagsusi pag-usab sa kondisyon ni Duterte sa dili pa magsugod ang husay.
Sumala sa korte, ang mga nangaging eksperto nga nagpahigayon sa eksaminasyon sa kanhi presidente mahimong gamiton pag-usab o mahimong itudlo ang usa ka bag-ong panel sa mga eksperto sa medisina, depende sa desisyon sa korte.
