Gipasidunggan sa mga nagdumala sa University of San Jose-Recoletos ang duha ka mga topnotchers sa nakalabay nga May 2026 Certified Public Accountants Licensure Examinations.
Kini gumikan duha gayud ang nalakip sa topnotcher sa maong eksaminasyon, kung diin si Certified Public Accountant Blas Miguel Escarro, anaa nahimutang sa rank 4 , ug Certified Public Accountant Joan Alliah Carilimdiliman, nga anaa nahimutang sa rank 10.
Gipasalamatan usab sa pangu sa Business and Accountancy Department sa maong tunghaan ang duha ka mga topnotchers tungod sa ilahang dungog ug dakong garbo nga gihatag ngadto sa ilahang bahin.
Sila si Blas Miguel ug Joan Alliah makadawat og cash incentives gikan sa USJR, isip usab paghatag og pasidungog sa ilahang nakab-ot nga kalampusan.
Sa nahimong pakighinabi sa mga sakop sa tigbalita sa duha ka topnotchers, ilahang gisaysay nga nakahimamat kini og kalisud ug mga hagit sa dalan nga ilahang gitahas aron na sa pagkab-ot sa ilahang gitagamtam nga kalampusan sa kasamtangan.
Ingun man nga ilahang gihataga’g bug-at ang nga pagtagad ang tumang paggugol og oras sa pagtuon, ilabi na nga ang maong eksaminasyon adunay kalambigitan sa mga numero.
Samtang, eksklusibo usab nga nahinabi sa Bombo Radyo Cebu newsteam nila ni Blas Miguel ug Joan Alliah, sila nagkanayon nga dako kaayo og tampo ang training sa ilahang tunghaan, busa mapasalamaton sila niini ug mihatag gayud og credit sa ilahang kalidad nga pagtuon nga nakuha.
Gani, matod pa ni Joan Alliah, sa dihang gipangutana kini kung sa unsang pamaagi makaabag ang CPA sa pag-promote og good governance, iyahang gitataw nga importante gayud nga adunay kasayuran ug masayod ang matag usa, kinahanglang gamiton ang mga kahinguhaan aron makahimo og makatarunganon nga mga desisyon, kay ang matag desisyon nga matag himoon, makaapekto ug makaamot sa nasud.
Ingun man sa habig ni Blas Miguel, miluwat usab kini og mensahe sa mga indibidwal o politiko nga anaay kasamtangang posisyon, matod niya, mas maayo nga unahon og prayoridad ang katawhan ug sa matag lungsoranon.
