Nagsumite og resolusyon si Senate President Pro Tempore Win Gatchalian nga nagduso sa imbestigasyon sa kanunay nga pagdeklara og red ug yellow alert sa National Grid Corporation of the Philippines (NGCP), nga giingong nakapahinungod sa sunod-sunod nga brownout sa Luzon ug Visayas.
Sa iyang Senate Resolution No. 425, gipasiugda ni Gatchalian nga ang gilauman nga pagkusog sa El Niño phenomenon sulod sa katapusang upat ka bulan sa tuig hangtod Enero sa sunod tuig mahimong makapasamot sa kakulangon sa suplay sa kuryente sa nasud.
Base sa datos gikan Mayo 12 hangtod Mayo 31, ang Visayas grid miagi sa red alert sulod sa 22 ka interval hours ug yellow alert sulod sa 93 ka interval hours.
Sa samang panahon, ang Luzon grid nakasinati og red alert sulod sa 27 ka interval hours ug yellow alert sulod sa halos 5.5 ka interval hours.
Sumala sa senador, ang imbestigasyon magatutok sa pagtino sa tinuod nga kahimtang sa suplay sa kuryente sa nasud, pagpalig-on sa grid reliability, pagpanubag sa mga stakeholders, pagsiguro sa pagsunod sa generation companies sa industry standards, ug pagpalambo sa epektibong interbensyon sa gobyerno, lakip na ang hugot nga pagpatuman sa Energy Efficiency and Conservation Act ug demand-side management measures.
