Mahimong makapagawas og hukom ang Senate Impeachment Court bahin sa kaso sa impeachment ni Bise Presidente Sara Duterte tali sa tunga-tunga ug sa katapusan sa Nobyembre, sumala ni Senate President Sherwin Gatchalian.
Sa usa ka interbyu, gipahayag ni Gatchalian nga tumong nila nga tapuson ang pagdungog ug magpagawas og desisyon sa dili pa matapos ang Nobyembre, bisan pa man nga giangkon niya nga mahimo pang mausab ang schedule depende sa dagan sa mga pagdungog.
Dugang ni Gatchalian, gilauman nga tapuson sa prosekusyon ang ilang presentasyon alang sa Article 2 diin ang pasangil bahin sa dili masaysay nga bahandi—karong semanaha o sa sunod, nga sundan sa Article 4 (pagdawat og suborno), sa dili pa mopadayon sa presentasyon sa depensa.
Naglaum usab ang Senate President nga mas paspas nga molihok ang bahin sa depensa sa husay, sanglit naanad na ang mga hingtungdan nga partido ug ang impeachment court sa maong proseso.
Gibanabana niya nga ang presentasyon sa depensa mahimong molungtad og 30 ngadto sa 45 ka adlaw, apan gipasiugda niya nga personal lamang kini nga banabana ug mahimong mausab base sa mga saksi nga ipresentar ug uban pang mga kausaban sa iskedyul.
Una nang gipadayag ni Gatchalian ang iyang tinguha nga tapuson ang mga proseso sa impeachment ug makab-ot ang hukom sa dili pa ang Pasko.
Samtang, angay hinumdoman nga ang tigpamaba sa Senate Impeachment Court nga si Atty. Reginald Tongol una nang nagpahayag nga mahimong malangan ang pagpagawas sa hukom hangtod sa Disyembre 16 kung gamiton sa depensa ang tibuok 30 ka adlaw nga gigahin alang sa presentasyon sa ilang mga ebidensya.
