Gipaambit ni Trade and Industry Secretary Ma. Cristina Roque nga ang gisugyot nga Revitalizing the Automotive Industry for Competitiveness Enhancement (RACE) nga programa subay gihapon sa incentives program sa mga tiggama og electric vehicles (EVs).
Ang RACE nagtumong sa paghatag og mga insentibo sa mga tiggama og sakyanan kung sila adunay domestic operations. Gikataho nga kini gi-shelf na kaniadto.
Ubos niining gisugyot nga programa, ang mga mamumuhunan nga moapil makadawat og mga insentibo kung sila makahimo og 100,000 ka unit sa tulo ka piho nga modelo sa four-wheeled internal combustion engine (ICE) nga mga sakyanan.
Ang naunang gisugyot mao nga ang matag mamumuhunan makadawat og suporta sa panalapi nga dili molapas sa PHP3 bilyon, o 40 porsyento sa capital expenditure.
Si Roque midumili sa pagpasabot sa pinakabag-ong mga kalamboan sa programa sa RACE, nga nag-ingon nga dugang mga detalye, sama sa mga giya, ipahibalo sa umaabot nga mga adlaw.
Ang hepe sa Trade miingon nga adunay panginahanglan sa pagsuporta sa mga tiggama tungod kay ang mga four-wheeled ICE nga mga sakyanan gigamit sa mga micro, small ug medium nga mga negosyo samtang ang uban gigamit isip mga ambulansya ug mga sakyanan sa pulisya.
