Padayong nisaka ang ihap sa mga namatay tungod sa magnitude 7.8 nga linog nga miigo sa pipila ka bahin sa Mindanao niadtong Hunyo 8, 2026, diin, niabot na kini ngadto sa 55, sumala sa datos gikan sa National Disaster Risk Reduction and Management Council (NDRRMC).
Kapin liboan ka mga indibidwal ang natalang naangol usab sa maong linog, diin basi sa beripikasyon nga gihimo, niabot kini sa 1,120.
Samtang nisaka na ngadto sa 38 ang gidaghanon sa mga missing usab sumala sa Office of Civil Defense (OCD).
Sumala ni Civil Defense Deputy Administrator Bernardo Rafaelito Alejandro IV, nisaka ang gidaghanon sa mga nawala human makadawat og bag-ong mga report gikan sa Glan, Sarangani ug General Santos City.
Ang Department of Health ug ang Department of the Interior and Local Government nagpadayon sa pag-verify sa gidaghanon sa mga namatay aron itandi kini sa ubang mga report sa gobyerno.
Giklaro usab ni Alejandro nga ang rekord sa OCD miagi sa hingpit nga pag-double-check aron malikayan ang doble nga pag-ihap o pagreport sa mga nawala nga patay.
Samtang, ang mga coastal area sa Glan, Jose Abad Santos sa Davao Occidental, ug Balut Island nagpabilin nga lisod maabot tungod sa mga landslide nga gipahinabo sa linog.
Hinuon, ang Department of Public Works and Highways nagpadayon sa clearing operations samtang ang mga awtoridad naggamit og mga helikopter ug mga barko sa dagat aron maghatud og tabang sa mga apektadong komunidad.
Nag-ingun usab ang OCD nga ilang susihon una ang sitwasyon sa mga lugar sa dili pa modesisyon kung ipadayon ba ang search and rescue operations o mobalhin sa retrieval operations sa umaabot nga mga adlaw.
