Nagpasidaan sa publiko ang Philippine Institute of Volcanology and Seismology (PHIVOLCS) batok sa pagkaylap sa peke nga balita bahin sa linog nga may magnitude 7.8 nga miigo sa baybayon sa Sarangani sa miaging semana.
Sa usa ka pahayag, ang ahensya nanawagan sa publiko nga dili motuo sa peke nga balita ug mokuha hinuon og mga update gikan sa opisyal nga website ug mga online account sa DOST-PHIVOLCS.
Lakip sa sayop nga impormasyon nga gisalikway sa ahensya mao ang giingong sa panahon sa linog aduna kini magnitude 8.2, tungod kay wala pa’y teknolohiya nga makatagna sa petsa ug oras sa linog.
Gihimakak usab sa ahensya ang mga pangangkon nga ang linog gipahinabo sa mga bulkan sa ilalom sa Sarangani Bay.
Giklaro sa PHIVOLCS nga ang linog niadtong Hunyo 8 tectonic ang gigikanan ug gipahinabo sa paglihok sa Cotabato Trench, ug nga walay aktibong mga bulkan sa ilalom sa Sarangani Bay.
Sayop usab ang pagtuo nga ang mga liki sa kabukiran ug baybayon mga fault lines nga hinungdan sa linog nga may magnitude 7.8.
Gipasabot sa PHIVOLCS nga ang mga liki sa kabukiran mga tension crack nga mahimong hinungdan sa landslide, samtang ang mga liki sa baybayon ug mga suba gitawag nga lateral spread cracks nga resulta sa liquefaction ug mga inactive faults.
