Gikabutyag ni Cebu City Councilor Joel Garganera, Chairman of the City Council’s Committee on Environment, Natural Resources, Energy, and Other Utilities nga sa iyahang nasayran, ang napaabot sa ilahang habig mao nga ang SRP, kasamtangang gitambakan og basura, usa ka “transfer station.”
Dugang pa ni Garganera, ang usa ka transfer station nagpasabot nga ang basurang ipanglabay sa usa ka partikular nga luna, dili maabtan og 24 ka oras, ug hingpit na kining mabalhin.
Sa eksklusibong pakighinabi sa Bombo Radyo Cebu kaniya, wala gilimod ni Garganera nga nakabati siya og tumang kaguol gumikan kay ang nahitabo sa kasamtangan, ang SRP karon dili na makonsiderang transfer station kondi usa na gayud ka open dumpsite.
Matod pa niya, nasayud usab ang kadaghanan nga ang kanhi director sa DENR-EMB mibutyag nga walay pagtugot nga giluwat nga himuon kining transfer station ang SRP.
Apan ang kasamtangang director sa DENR-EMB giingong nitugot agi’g abag sa Dakbayan tungod sa bug-at nga suliran sa basura human sa trahedyang nahitabo sa Binaliw Landfill.
Hinuon, gitataw ni Garganera na nipasalig si Cebu City Mayor Archival nga sa Hunyo 15 ning tuiga, nga hingpit nang mahurot ang basurang natambak sa naasoyng dapit.
Apan alang kang Garganera, sa maong pasalig sa Mayor, dili mao ang panghitabo. Gani, gipanglantawan niya nga usa kini sa dakong problema nga giatubang sa konseho sa Dakbayan karon tungod sa minus og tranparensiya.
