Nagka-initay sila si Cebu City Councilor Joel Garganera ug Vice Mayor Tomas Osmeña atol sa sesyon sa konseho gahapong adlawa human gipangayoan ni Garganera si Osmeña og update bahin sa iyang naunang saad nga magpresentar og solusyon sa problema sa basura sa siyudad.
Nasuko si konsehal Garganera kay gibaraw siya ni Tommy Osmeña samtang nagpadayon pa ang iyang privilege speech.
Matod ni Osmeña, nakapresentar na siya og solusyon ug midugang nga ang pagpatuman niini nagdepende na lang kang Mayor Nestor Archival.
Atol sa pakighinabi sa Bombo News Team kang Konsehal Garganera, giplano ug gipasabot niini ang iyang bahin sa nahitabong lalis tali kaniya ug ni Bise Mayor, diin ang punto sa iyang diskurso nag-gikan sa privilege speech nga gipadala kaniadtong Mayo 26. Matud niya, nangayo og 60 ka adlaw aron makahatag og solusyon sa problema sa basura sa dakbayan.
Apan matud ni Garganera, nilabay na ang kapin 140 ka adlaw ug wala gihapon silay nadungog nga konkretong solusyon bahin niini.
Dugang pa sa konsehal, sa dihang iyang gipangutana ang bahin sa maong solusyon, gipahibalo sa pikas nga gihatag na ang maong dokumento ngadto sa Mayor. Apan gidiskutir ni Garganera nga wala kini gipasa o gipaabot sa konseho aron ilang masusi ug matun-an.
