Mosang-at og pormal nga reklamo sa FIFA ang World Cup team sa Iran tungod sa giingong mga pagdili sa ilang pagbiyahe samtang nagpadayon ang torneyo sa North America, sumala sa tigpamaba sa Iranian football federation niadtong Huwebes.
Matud pa sa tigpamaba, bisan pa ug sayo nilang napasa ang ilang eskedyul sa pagpangandam alang sa torneyo, nakasugat na usab ang nasyonal nga koponan sa Iran ug mga restriksyon nga gipahamtang sa mga organizer, butang nga nakaapekto sa mga plano sa ilang technical staff.
Gusto unta sa Iran nga molupad gikan sa ilang base camp sa Tijuana, Mexico, paingon sa Estados Unidos duha ka adlaw sa dili pa ang ilang sunod nga dula batok sa Belgium sa Los Angeles karong Dominggo, apan gibalibaran ang ilang hangyo.
Gipasabot sa federation nga tungod kay ang dula ipahigayon sa alas-12:00 sa udto local time sa Los Angeles, nihangyo sila nga tugotan ang koponan nga mobiyahe didto duha ka adlaw sa dili pa ang dula aron mahatagan ug igong panahon ang mga magduduha sa pag-adjust sa kondisyon, makasira sa ilang katapusang training session, ug mahuman ang mga pagpangandam, apan gidemalas gihapon ug gibalibaran.
Gawas niini, nasuko usab ang mga Iranian tungod kay gipabiya sila sa Los Angeles sa mismong gabii sa ilang unang dula sa World Cup, diin nagtabla sila sa New Zealand sa iskor nga 2-2.
Samtang sumala ni Andrew Giuliani, ang executive director sa White House FIFA Task Force, gipahibalo na daan ang Iran nga tugotan lang sila nga mosulod sa Estados Unidos usa ka adlaw sa dili pa ang dula ug kinahanglan silang mobiya sa gabii human mahuman ang dula, ug mao gihapon kini ang lagda nga ipatuman sa ilang dula sa Los Angeles ug sa ilang katapusang dula sa grupo batok sa Egypt didto sa Seattle karong Hunyo 26.
