Gipahayag ni House impeachment lead prosecutor Atty. Gerville “Jinky” Luistro nga posibleng adunay sulod nga mga mahatungdanong ebidensya ang nakaselyong kahon gikan sa Bureau of Internal Revenue (BIR) kalabot sa alegasyon nga unexplained wealth batok kang Vice President Sara Duterte.
Matod ni Luistro, makatabang ang mga dokumento sa sulod sa kahon aron mapamatud-an o masusi ang mga pasangil sa wala nadeklarar nga kayamanan, kakuwang sa pagbutyag sa Statement of Assets, Liabilities, and Net Worth (SALN), ug ang giingong wala pagbiya sa pipila ka interes sa negosyo.
Giapil ang maong BIR box sa rekord sa impeachment proceedings niadtong Abril apan nagpabilin kining nakaselyo human nidesisyon ang House Committee on Justice tungod sa mga posibleng legal nga isyu sa pagka-kumpidensyal sa tax records.
Gipatin-aw ni Luistro nga gusto unta sa komite nga ablihan ang kahon kaniadto, apan nag-amping lang kini aron malikayan ang posibleng paglapas sa mga probisyon sa National Internal Revenue Code.
Dugang niya, andam ang prosecution panel nga iduso ang ilang posisyon ngadto sa impeachment court kung kinahanglang hisgutan ug ablihan ang BIR box sa mga mosunod nga pagdungog.
