Nagsang-at si Parañaque 2nd District Rep. Brian Yamsuan og House Bill 9475, nga nagtinguha sa pagpataas sa Personnel Economic Relief Allowance (PERA) sa mga empleyado sa gobyerno gikan sa P2,000 ngadto sa P5,000 kada bulan.
Sumala ni Yamsuan, ang PERA wala pa mapataas sulod sa 17 ka tuig bisan pa sa padayon nga pagsaka sa presyo sa mga batakang palaliton, kuryente, plete, ug uban pang mga galastuhan.
Miingon siya nga lakip sa mga labing naapektuhan sa inflation mao ang mga magtutudlo sa publiko, health workers, clerks, ug mga maintenance personnel nga gibayran og ubos nga sweldo.
Ang balaodnon naglangkob sa mga empleyado sa nasyonal ug lokal nga gobyerno, lakip ang mga regular, contractual, ug casual personnel nga nasakup sa Compensation and Position Classification Act.
Samtang ang military ug uniformed personnel makabenepisyo usab niini, gawas sa mga na-assign sa gawas sa nasud nga nakadawat na og overseas allowance.
Ang balaodnon nag-ingon usab nga ang Department of Budget and Management, sa pakigtambayayong sa Civil Service Commission, Department of Economy, Planning and Development, ug uban pang mga ahensya, morepaso sa kantidad sa PERA matag tulo ka tuig base sa inflation, cost of living, ug kapasidad sa pondo sa gobyerno.
Kon mapatuman, ang pundo para sa unang tuig nga pagpataas sa PERA kuhaon gikan sa tinigom sa gobyerno, samtang ang pundo para sa sunod nga mga tuig ilakip sa General Appropriations Act.
