Natala ang Pilipinas sa pinakahinay nga pagtubo sa ekonomiya sa unang kwarter sa 2026 sukad sa pandemya, sumala sa Philippine Statistics Authority (PSA), human mitubo lamang og 2.8% ang gross domestic product (GDP) gikan Enero hangtod Marso ning tuiga.
Matod ni PSA Chief ug National Statistician Dennis Mapa, ang 2.8% nga GDP growth mas ubos kon itandi sa 5.4% nga natala sa unang kwarter sa miaging tuig ug 3% sa ikaupat nga kwarter sa 2025.
Kini usab ang pinakahinay nga pagtubo sukad sa 3.8% nga natala sa unang kwarter sa 2021 atol sa kataas sa lockdown sa COVID-19 pandemic.
Sumala sa PSA, ang sektor sa serbisyo mao ang nakatala og pagtubo, samtang ang agrikultura, forestry ug fishing, ug industriya nakasinati og pagkunhod sa performance.
Sa iyang pahayag, giingon ni Department of Economy, Planning, and Development (DEPDev) Secretary Arsenio Balisacan nga ang hinay nga growth giatubang sa epekto sa nagkalain-laing hinungdan, lakip ang nagdugay nga isyu sa korapsyon sa flood control projects, mga paglangan sa national budget, ug ang epekto sa gubat sa Middle East nga nakaapekto sa presyo sa lana.
Giapil usab niya ang taas nga inflation isip usa sa nakaapekto sa konsumo ug ekonomikanhong kalihokan sa nasud.
Matod pa ni Balisacan, ang gobyerno padayon nga nagtan-aw og mga paagi aron matubag ang maong mga isyu ug mapalig-on ang ekonomiya.
Giangkon usab sa economic managers nga ang performance sa Pilipinas mas hinay kon itandi sa ubang silingang nasod sama sa Vietnam, Indonesia, ug China.
Ang 2.8% nga growth ubos usab sa target sa gobyerno nga 5% hangtod 6% alang sa 2026, bisan pa sa kanhing paglaum nga makabawi ang ekonomiya sa mas kusog nga lebel karong tuiga.
