Gisupak ni Senador Bam Aquino ang sugyot ni Senador Risa Hontiveros nga idili ang mga online game nga dili mokooperar sa imbestigasyon sa pagpamusil sa San Jose National High School sa Tacloban City niadtong Hunyo 22.
Ang madugoong insidente, nga naglambigit sa duha ka menor de edad, maoy hinungdan sa pagpadali sa Senado sa imbestigasyon sa maong kaso.
Si Aquino, chairperson sa Senate Committee on Basic Education, miingon nga imbes nga hingpit nga idili ang mga online game, mas angay nga tutokan ang pagpatuman sa mga lakang ilawom sa gisugyot nga School Safety Act aron mapalig-on ang seguridad sa mga eskwelahan.
Samtang, si Hontiveros, chairperson sa Senate Committee on Women, Children, Family Relations, and Gender Equality, nagdapit sa developer sa German-based online game nga GoreBox aron motambong sa Senate hearing sa Hulyo 1, apan kini midumili sa personal nga pagtambong.
Ang hearing nagtumong sa pag-imbestigar sa giingong paggamit sa mga online platform ug gaming spaces sa pag-andam, pagmaniobra, ug pag-radicalize sa mga bata ngadto sa kapintasan.
Bisan pa niini, gipahayag sa game developer sa ilang opisyal nga tubag nga andam silang mokooperar sa imbestigasyon bisan dili sila makatambong sa hearing.
Tungod sa maong pagdumili, nangayo si Hontiveros og tabang sa German Embassy to the Philippines ug nagpasidaan nga ang mga tagdumala sa dula mahimong manubag kon mapakyas silang mokooperar sa imbestigasyon.
