Nagpasaka og reklamo ang kampo sa boksidor nga si Eman Bacosa Pacquiao sa Games and Amusement Board (GAB) batok sa iyang katapusang kontra ug sa referee nga nagdumala sa ilang away.
Ang reklamo may kalabutan sa giingong balik-balik ug tinuyo nga “rabbit punches” o mga suntok sa likod sa ulo, nga gidili ubos sa mga lagda sa boksing.
Kahinumduman nga nag-atbang sila ni Rodelyn Perez niadtong Hunyo 21 alang sa PBF Youth Lightweight title, diin si Jerold Tomeldan ang referee. Nadaog ni Perez ang maong away pinaagi sa majority decision.
Sumala ni Joanna Rose Bacosa Dino, inahan ug manager ni Pacquiao, dili aksidente ang mga giingong ilegal nga suntok ug mas giuna nila ang kahimtang sa panglawas sa boksidor kaysa sa resulta sa away.
Gibutyag usab sa kampo ni Pacquiao nga bisan pa sa ilang giingong balik-balik nga ilegal nga mga suntok, wala magpahamtang og diskwalipikasyon ang referee batok kang Perez.
Dugang ni Dino, atol sa away mireklamo si Eman nga mibati siya og pagkagahi sa lawas nga nagsugod sa iyang mga tiil ug mikaylap sa tibuok niyang lawas. Gipailalom na siya sa CT scan ug naghulat pa sa resulta niini.
Samtang, gikumpirma sa GAB nga nadawat na niini ang reklamo nga may kalabutan sa giingong misconduct ug officiating lapses.
Miingon ang Board nga sundon niini ang hustong proseso ug mangayo og mga pagpasabot gikan sa tanang nalambigit sa dili pa mopagawas og desisyon.
