Natapos ang makasaysayanong FIFA World Cup career ni Cristiano Ronaldo human mapildi ang Portugal sa Spain, 1-0, sa Round of 16 niadtong Lunes.
Emosyonal nga mibiya si Ronaldo sa estadyum human sa katapusang duwa sa iyang World Cup career, diin gipakpakan siya sa mga fans isip pagpasidungog sa usa sa labing bantugang footballer sa kasaysayan.
Sa edad nga 41, natapos ang ikaunom ug katapusang pag-apil ni Ronaldo sa FIFA World Cup.
Nakarekord siya og 27 ka duwa sa torneyo ug nahimong unang footballer nga nakaiskor sa unom ka nagkadaiyang edisyon sa World Cup.
Bisan pa sa iyang daghang rekord ug kalampusan sa football, wala gyud makuha ni Ronaldo ang labing gitinguha nga FIFA World Cup trophy.
Ang katapusang panaw ni Ronaldo sa maong torneyo natapos human nakapuntos si Mikel Merino sa unang minuto sa stoppage time sa ikaduhang bahin, nga maoy naghatag og daog sa Spain ug mipadangat kanila sa quarterfinals.
Gidayeg ni Portugal head coach Roberto Martínez ang iyang Captain, nga iyang gihulagway isip ehemplo sa dedikasyon, liderato, ug inspirasyon sa kalibutan sa football.
Bisan nakaiskor og tulo ka goal sa torneyo, napugngan si Ronaldo ug ang Portugal sa lig-on nga depensa sa Spain nga gipangulohan sa goalkeeper nga si Unai Simón.
Gipanalipdan usab ni Martínez ang iyang desisyon nga pasagdan si Ronaldo nga moduwa sa tibuok 90 minutos, tungod sa iyang presensya ug abilidad sa paghatag og kalainan sa duwa.
Sa wala pa ang knockout match, gikumpirma ni Ronaldo nga mao na kini ang iyang katapusang FIFA World Cup.
Siya ug si Lionel Messi lamang ang mga magdudula nga nakaapil sa unom ka edisyon sa World Cup, samtang si Ronaldo mao usab ang unang footballer nga nakaiskor sa unom ka nagkadaiyang World Cup.
Sa pikas bahain, mopadayon ang Spain sa quarterfinals diin ilang atubangon ang modaog sa duwa tali sa United States ug Belgium.
