Plano nga ipa-subpoena sa House Prosecution panel si Bise Presidente Sara Duterte aron pugson siya sa pagtestigo sa impeachment article bahin sa mga pasangil sa grave threats, sumala sa abogado sa mga prosecutor nga si Atty. Lorna Kapunan.
Matud niini nga ang tumong sa prosekusyon mao ang pagpasaka og hangyo alang sa subpoena sulod sa 11 ka adlaw nga gitakda alang sa pagpresentar sa ebidensya alang sa article four.
Dugang ni Atty. Kapunan, ang maong hangyo ipasaka sa Martes subay sa mga pamaagi sa korte ug ubanan sa legal memoranda gikan sa depensa ug prosekusyon.
Sa pikas bahin, naghatag og kalibog ang habig sa usa ka opisyal sa National Bureau of Investigation ang pagpangutana ni Senator-Judge Robin Padilla bahin sa identidad sa indibidwal nga nagrekord sa video ni Bise Presidente Sara Duterte.
Sa tunga-tunga sa hearing, nangayo si Padilla og testimonya sa giingong tawo sa luyo sa pagrekord sa maong video aron masusi ug mapamatud-an ang pagkatinuod sa video material.
Tungod niini, adunay kalibog sa bahin sa saksi, nga si NBI Agent Mark Calilung.
Gumikan nahimong si Calilung mismo ang naghimo sa screen record sa video gamit ang usa ka application isip kabahin sa ilang imbestigasyon.
Bisan pa, giklaro atol sa hearing nga ang tinuod nga gipasabot ug gipangita ni Padilla dili ang tawo nga naghimo sa screen record, apan ang tawo nga tinuod nga nagkuha o nag-film sa orihinal nga video ni VP Duterte aron masiguro ang kredibilidad sa ebidensya.
