Labing menos 15 ka tawo ang namatay human sa duha ka managlahing pagdahili sa yuta nga nahitabo sa Sarangani ug Lanao del Sur.
Sa Malapatan, Sarangani, 10 ka tawo ang namatay human sa pagdahili sa yuta nga mitabon sa mga balay sa Barangay Poblacion, sumala sa Municipal Disaster Risk Reduction and Management Office (MDRRMO).
Base sa report, ang mga namatay gikan sa duha ka pamilya, lakip ang pipila ka mga bata.
Matod ni Malapatan Mayor Salway Sumbo Jr., gipahigayon dayon ang rescue operation human makadawat og report ang mga opisyal sa barangay bahin sa maong insidente.
Gisusi usab sa mga awtoridad ang posibleng hinungdan sa pagdahili sa yuta, lakip ang epekto sa magnitude 7.8 nga linog nga miigo sa lugar niadtong Hunyo 8, 2026, nga gituohang nakapahumok sa yuta ug nakadugang sa risgo sa pagdahili.
Tungod sa maong trahedya, nagplano ang gobyerno sa probinsya nga ibalhin ang mga pamilyang nagpuyo sa mga lugar nga delikado ug dali maigo sa pagdahili sa yuta.
Gibanabana nga 115 ka pamilya gikan sa duha ka barangay sa Malapatan ang naapektuhan sa kusog nga ulan nga dala sa Bagyong Inday.
Samtang, sa Barangay Ngingir, Calanogas, Lanao del Sur, lima ka tawo ang namatay, samtang unom pa ang wala gihapon makaplagan.
Sumala sa Lanao del Sur Police Provincial Office (LDSPPO), duha ka tawo ang nasamdan sa insidente tungod sa padayon ug kusog nga pag-ulan sa maong lugar.
Nagpadayon sa kasamtangan ang search and rescue operations alang sa unom pa ka mga tawo nga gituohang natabunan sa pagdahili sa yuta uban sa ilang mga balay.
