Gipahibalo sa Philippine National Police (PNP) General Hospital nga ‘fit to travel’ na si Senador Rodante Marcoleta human ma-diagnose nga adunay mild pneumonia.
Bisan pa nga angayan nga mobiyahe, girekomenda sa mga doktor nga tapuson una sa senador ang iyang pagtambal ug pag-inom og antibiotics alang sa mild pneumonia hangtod Hulyo 15, 2026.
Matod ni Lt. Col. Benaly Bayani sa PNP General Hospital, maayo na ang kahimtang sa senador ug mahimo kining moatubang sa korte basta magsul-ob og face mask. Wala na siya maglisod sa pagginhawa.
Kahinumduman nga na-confine si Marcoleta human makasinati og panakit sa dughan ug altapresyon nunot sa pagkasikop niini sa kasong plunder niadtong Hulyo 6, 2026.
Ang iyang nangaging mga pagsulay nagpadayag usab sa ubang mga kondisyon sama sa degenerative disc disease ug high blood pressure.
Si Marcoleta gipaabot nga ipresentar sa Sandiganbayan alang sa iyang commitment order kon mahuman na ang iyang pagpatambal.
