Nagsang-at og kasong plunder ang Office of the Ombudsman batok kang Senador Rodante Marcoleta may kalabotan sa giingong wala gideklarar nga ₱75 milyon nga donasyon sa kampanya nga iyang nadawat niadtong 2025.
Ang kaso gisumite sa Sandiganbayan ug naglakip usab sa mga giingong donor lakip si kanhi kongresista Mike Defensor ug mga negosyante nga sila Aristotle Viray ug Joseph Espiritu.
Sumala sa reklamo, wala gideklarar ang maong kantidad sa Statement of Assets, Liabilities and Net Worth (SALN) ug Statement of Contributions and Expenditures (SOCE), nga giingong milapas sa ₱50 milyon nga threshold para sa plunder ubos sa Republic Act 7080.
Sa iyang counter-affidavit, giangkon ni Marcoleta nga nakadawat siya og donasyon apan giinsistir nga gikan kini sa pribadong mga higala ug gigamit na sa kampanya sa wala pa ang pagsumite sa iyang SALN.
Samtang, mipahigayon og tulo ka adlaw nga rally ang mga miyembro sa Iglesia ni Cristo isip suporta sa senador, diin mitambong usab ug namulong si Senador Imee Marcos ug kanhi kongresista Mike Defensor.
Padayon pa ang proseso sa Sandiganbayan, samtang ang Criminal Investigation and Detection Group (CIDG) andam nga mopatuman sa posibleng arrest warrant kung kini i-isyu sa korte.
