Giila sa Cebu City Police Office (CCPO) ang usa ka kanhi binilanggo kinsa giingong nanamastamas sa usa ka babayeng tindera sulod sa usa ka tindahan sa ilimnon sa Barangay Basak San Nicolas, Cebu City, niadtong Huwebes sa gabii, Hulyo 10.
Sumala sa taho sa kapolisan, nahitabo ang krimen sa dihang sirado ang tindahan ug ang suspek, kinsa mao ang katapusang kustomer, giingong nagdala sa biktima ngadto sa kanto sa establisemento diin gihimo ang pag-atake.
Nakuha sa CCTV camera sa tindahan ang tibuok insidente, diin makita ang suspek nga naghulga sa biktima gamit ang kutsilyo ug giguyod kini ngadto sa usa ka hilit nga lugar sulod sa tindahan. Misulay pag-ikyas ang biktima apan nadakpan sa suspek nga naghulga kaniya nga dunggabon.
Gibutyag ni CCPO Deputy City Director for Administration PLTCOL Franco Rudolf Oriol nga nailhan sa mga imbestigador ang suspek tungod sa talagsaong mga tattoo sa iyang duha ka bukton. Nasayran usab sa pulis nga ang suspek nadakpan na kaniadto niadtong Mayo 2026 tungod sa alarm and scandal ug grave threats, apan nakagawas human makapiyansa.
Giduso na sa Police Station 11ang pag-andam sa mga gikinahanglan nga dokumento alang sa pagpasaka og tukmang kaso sa pagpanglugos batok sa suspek, human makuha ang affidavit gikan sa biktima. Samtang, nagpadayon ang hot pursuit operation sa mga awtoridad aron madakpan ang suspek nga nagpabiling gawasnon.
