Gipasalig ni Cebu City Mayor Archival nga tabangan sa kagamhanan sa Dakbayan sa Sugbo ang biktima sa pagpanamastamas sa usa ka lalaki nga nahitabo sa usa ka imnanan sa Barangay San Nicholas niadtong Hulyo 10, pasado alas 2 sa kadlawon.
Matud ni Archival nga iyang gimandoan ang Department of Social Welfare and Services.
sa pagpahigayon og intervention program nga gikinahanglan sa babayeng biktima aron maka recover sa trauma nga naagian niini sama nalang sa pagpaubos kaniya sa psychosocial intervention.
Samtang nimando usab ang Mayor ngadto sa Cebu City Police Office nga kinahanglang masikop gyud ang suspek sa nahitabong pagpanamastamas sa usa ka babaye sa usa ka imnanan sa Barangay San Nicholas niadtong Hulyo 10, pasado alas 2 sa kadlawon.
Matud ni Archival, nga ang maong kaso usa lamang ka isolated case ug wala nagpasabot nga adunay hulga sa siguridad sa kinatibuk-an sa Dakbayan sa Sugbo, gane dugang pa sa opisyal nga ang Sugbo maoy anaa sa pinaka ubos nga crime rate.
Gi-awhag usab sa Mayor ang suspek nga motahan nalang ug atubangon ang salaod nga iyang nabuhat ug gihimug-atan nga pangitaon gayud ug dakpon siya.
Sa pikas bahin, nanawagan usab si Archival sa publiko nga dili biay-biayan ang biktima inay tabangan kini pinaagi sa paghatag og simpatiya sa nasinati niini.
Kahinumdoman nga giila ang suspek nga mao si Clark David Tejido usa ka ex-convict samtang ang biktima usa ka 26-anyos nga cashier sa nahisgutang imnanan.
