Nagpagawas og seryosong pasidaan ang World Health Organization (WHO) niadtong Huwebes nga ang Ebola virus mas paspas nga mikaylap karon sa Democratic Republic of Congo (DR Congo) kung itandi sa bisan unsang nangaging pag-ulbo sa maong makamatay nga sakit.
Sumala ni WHO Director-General Tedros Adhanom Ghebreyesus, kapin sa 2,000 ka mga kaso sa Ebola ang natala na sa maong nasod, diin 796 na ang namatay sulod lang sa duha ka bulan sukad opisyal nga gideklarar ang pag-ulbo niini.
Giingon nga kini na ang ikatulo nga labing dako nga pag-ulbo sa Ebola sa kasaysayan sa kalibutan.
Gipahayag ni Tedros nga mas paspas ang dagan sa transmisyon karon kaysa sa nataging grabe nga pag-ulbo sa DR Congo niadtong 2018 hangtod 2020, diin milungtad pa og kapin sa 10 ka bulan una niini naabot ang 2,000 ka mga kumpirmadong kaso.
Ang maong ika-17 nga pag-ulbo sa Ebola sa nasod unang natala niadtong Mayo 15 human sa sunod-sunod nga kamatayon sa probinsya sa Ituri, usa ka dapit sa amihanan-sidlakang bahin sa DRC nga padayong nakasinati og kagubot gumikan sa mga armadong grupo.
Nag-atubang karon og dakong hagit ang mga awtoridad sa panglawas tungod sa nagpadayon nga armadong panagbangi sa maong mga dapit.
Bag-ohay lang, giatake ang usa ka Ebola treatment center didto sa Bunia.
Sa pagkakaron, ang mga kaso sa Ebola natala na sa lima ka probinsya sa DR Congo ug nakatabok na usab ngadto sa silingang nasod sa Uganda.
Samtang, gibutyag sa WHO nga ang kasamtangang pag-ulbo gipahinabo sa talagsaon nga Bundibugyo strain sa Ebola virus, diin wala pa’y naaprobahan nga opisyal nga bakuna o tambal hangtod karon.
