Nagkagrabe ang pagkaylap sa Bundibugyo virus disease (BVD), usa ka matang sa Ebola, sa Democratic Republic of the Congo (DRC).
Nagsugod ang outbreak sa Mongbwalu Health Zone sa lalawigan sa Ituri, apan mikaylap na kini sa lima ka probinsya ug nakaapekto na sa 49 ka health zones.
Base sa datos hangtod Hulyo 30, 2026, mikabat na sa 3,605 ang kumpirmadong kaso ug 1,587 ang namatay, nga adunay case fatality rate nga 44 porsiyento.
Sa pinakabag-ong taho, natala ang pinakataas nga ihap sa mga kaso sulod sa usa ka semana nga miabot sa 567, samtang 296 ang namatay. Nagpakita kini sa paspas nga pagkaylap sa sakit.
Sumala sa mga awtoridad, ang padayon nga kapintasan, pagpamakwit sa mga molupyo, ug ang walay hunong nga pagtabok sa utlanan maoy naglisod sa mga paningkamot sa pagpugong sa outbreak ug nagdugang sa risgo sa mas lapad pang pagkaylap sa virus.
Nagpadayon ang gobyerno sa Congo sa pagpakigkoordinar sa World Health Organization (WHO) ug uban pang mga kauban nga organisasyon aron mapugngan ang outbreak.
Apan, giingon nga gikinahanglan pa ang mas agresibong mga lakang aron makontrol ang nagpadayon nga krisis.
Tungod niini, gipahinumdoman sa WHO ang tanang nasud nga magpabiling mabinantayon, magpalig-on sa pagpangandam, ug hugtan ang mga lakang sa pagkontrol sa sakit aron mapugngan ang posibleng pagtabok sa impeksiyon ngadto sa ubang mga nasud.
