Misaka pag-usab ang tensyon sa West Philippine Sea human gibabagan sa Chinese Coast Guard (CCG) ang usa ka barko sa Pilipinas nga nagdala unta og pagkaon, gasolina, ug uban pang suplay alang sa mga Pilipinong mangingisda sa maong lugar.
Gikataho nga ang barko sa Bureau of Fisheries and Aquatic Resources (BFAR) anaa mga 100 nautical miles gikan sa Zambales sa dihang gisundan kini sa usa ka barko sa CCG.
Gihangyo sa BRP Datu Dumangsil ang barko sa China nga mopahilayo ug magmintinar og luwas nga distansya.
Mitubag ang CCG nga ang mga barko sa Pilipinas giingong misulod sa ilang gitawag nga Huangyan Island, nga nailhan sa Pilipinas isip Bajo de Masinloc.
Sa dihang mga 13 nautical miles na lamang ang gilay-on sa mga barko sa Pilipinas gikan sa Bajo de Masinloc, migamit og water cannon ang CCG, bisan pa nga wala kini direktang gipunting sa barko sa Pilipinas.
Sumala sa Philippine Coast Guard (PCG), milungtad og mga duha ka minuto ang pagpabuto sa water cannon sa Chinese Coast Guard.
Bisan pa sa maong insidente, nahuman sa BFAR ug PCG ang ilang misyon sa paghatod og tabang ug suplay ngadto sa mga Pilipinong mangingisda sa maong lugar.
