Labing menos usa ka tawo ang namatay ug 16 pa ang naangol human ang usa ka sakyanan nidaro sa panon sa katawhan atol sa gipahigayon nga Pride event sa Berlin, Germany niadtong Sabado sa gabii.
Gipahayag sa pulisya sa Berlin nga ilang nailhan ang usa ka suspek nga daan nang adunay rekord sa ilang buhatan ug gidudahan nga adunay koneksyon sa mga Islamist circle.
Kasamtangang nagpahigayon og manhunt operation ang mga awtoridad gamit ang mga helikopter ug dugang nga pwersa aron madakpan kini.
Sumala sa taho sa mga awtoridad, usa ka puti nga sakyanan ang nidaro sa am think sa mga tawo sa wala pa mag-alas 10:00 sa gabii, lokal nga oras, sa dili pa kini nabangga sa usa ka kahoy sa parke.
Sa 16 ka mga naangol, walo ang nag-antus og grabeng samad diin tulo kanila ang anaa sa kritikal.
Nahitabo ang maong insidente sa Tiergarten Park, usa sa pinakadako nga parke sa Berlin nga nahimutang duol sa Brandenburg Gate diin gipahigayon ang maong selebrasyon sa LGBTQ+.
Sa sayo pa nianang adlawa, liboan ka mga tawo ang nagmartsa sa Berlin aron ipasiugda ang katungod sa LGBTQ+ atol sa tinuig nga Christopher Street Day Parade.
Ang maong selebrasyon, nga giisip nga usa sa pinakadakong Pride event sa Europa, dali nga gikansela sa mga organisador ug pulisya pagkahuman sa maong pag-atake.
