Gitangtang sa Maharlika Pilipinas Basketball League (MPBL) ang Bacolod Masskara sa nahibilin nga bahin sa season tungod sa giingong game manipulation sa ilang duwa batok sa Bulacan Kuyas.
Sa maong duwa, napildi ang Bacolod sa iskor nga 100-64. Wala usab sila makapuntos sa katapusang 7 minutos ug 48 segundos sa ikaupat nga quarter ug nakahimo og unom ka turnovers.
Matod ni MPBL Commissioner Emmer Oreta, dili tugotan sa liga ang bisan unsang lihok nga makadaot sa integridad sa basketball sa Pilipinas ug sa pagsalig sa mga fans, teams, ug publiko.
Gipahayag usab sa MPBL nga gipasidan-an na kaniadto ang Bacolod Masskara bahin sa mga insidenteng gitaho ngadto sa opisina sa commissioner.
Giuyonan ni MPBL Founder ug CEO Manny Pacquiao ang maong silot human niya matan-aw ang nahisgutang duwa.
Samtang, nagpahigayon usab og fact-finding investigation ang Games and Amusements Board (GAB).
Ang mga magdudula ug uban pang nalambigit hatagan og higayon nga makapahayag sa ilang bahin aron masiguro ang due process sa dili pa ipagawas ang pinal nga desisyon.
