Hugot nga gihimakak ni Senate Minority Leader Alan Peter Cayetano nga nangayo siya og “ceasefire” gikan ni Sen. Panfilo “Ping” Lacson kalabot sa ilang panaglalis bahin sa isyu sa giingong “ghost projects” sa Taguig City.
Ang pamahayag ni Cayetano tubag sa post ni Lacson sa social media diin iyang giingon nga usa ka senador ang giingong “naghunghong” nga nangayo og ceasefire, bisan wala siyay gihisgutan nga mga ngalan.
Sumala ni Cayetano, daghang mga senador ang nagpahayag sa ilang kabalaka nga ang ilang pagbayloay og mga akusasyon makadaot sa imahe sa Senado, makabalda sa atensyon gikan sa mas importanteng mga isyu, ug makaapekto sa interes sa publiko.
Dugang nga giinsistir sa senador nga mas importante ang pag-focus sa mga isyu sama sa taas nga presyo sa kuryente ug lana, online gaming, ug vaping kaysa personal nga mga panaglalis.
Si Cayetano miingon usab nga andam siyang moatubang sa bisan unsang mga pasangil nga ibato kaniya.
