Mimugna si Cebu Governor Pamela Baricuatro og Super El Niño Task Force aron mangandam sa posibleng grabeng huwaw nga gilaomang molungtad hangtod sa first quarter sa 2027.
Pinaagi sa Executive Order No. 57 nga gipirmahan niadtong Oktubre 26, gipangulohan ni retired Col. Dennis Francis V. Pastor ang task force, uban ni Provincial Administrator Atty. Joseph Felix Mari H. Durano isip vice chairperson.
Base sa PAGASA advisory, posibleng molig-on ang Strong El Niño ug mahimong Very Strong El Niño sa kataposang mga bulan sa 2026.
Tutokan sa task force ang seguridad sa tubig, pagkaon, enerhiya, panglawas ug panginabuhian, lakip ang pagmonitor sa mga lugar nga posibleng maapektuhan, emergency water distribution ug ayuda sa mga mag-uuma.
Sulod sa 15 ka adlaw, kinahanglan isumiter ang unang risk assessment ug action plan, samtang magpasa og kahimtang ug aksyon nga report matag duha ka semana ngadto sa gobernador.
