Nanawagan si Cebu Archbishop Alberto Uy ngadto sa mga opisyal sa gobyerno, developers, ug mga pumoluyo nga unahon ang pagpanalipod sa kalikopan human gibaha ang nagkalain-laing dapit sa Sugbo, tungod sa sunod-sunod nga kusog nga pag-uwan.
Sa iyang mensahe, gipahinumdoman sa arsobispo nga ang pag-uswag sa ekonomiya dili angay nga makadaot sa kinaiyahan ug ingun man sa kinabuhi sa tawo.
Giawhag niya ang mga lider sa pagpatuman og malungtarong solusyon sama sa pag-atiman sa mga watershed, pagprotekta sa mga lasang, ug pagpanindot sa mga drainage system nga walay kalabotan sa korapsyon.
Nanawagan usab siya sa pribadong sektor ug sa katawhan nga magtinabangay sa saktong paglabay sa basura, pagtanom og kahoy, ug responsableng paggamit sa kinaiyahan.
Samtang padayon ang clearing operations ug paglimpyo sa mga trabahante sa kagamhanan sa dakbayan sa Sugbo, gipasalig usab ni Cebu City Mayor Nestor Archival nga pakusgan pa ang mga lakang batok sa baha ug nanawagan sa kooperasyon sa publiko.
