Gipadayag ni Senador Alan Peter Cayetano ang iyang pagkadismaya batok sa gihulagway niya nga “trolling” sa usa ka kaubang senator-judge, diin pulos ra matud pa “marites,” hungihong (hearsay), ug walay igong katakus ang mga gipang-akusar batok sa kaniya ug sa gipanghiusa nga mga proyekto.
Matud pa ni Cayetano, imbes nga itugyan sa hustong ahensya sa gobyerno ang imbestigasyon, sige hinuon og batikos ug pamasangil ang maong senador nga walay lig-ong ebidensya.
Gipahinumdoman usab ni Cayetano ang iyang taas nga kasaysayan ug ka-experience sa panggobyerno sa Taguig ug Pateros—sugod sa iyang amahan nga nahimong assemblyman niadtong 1984, hangtod sa iyang kaugalingong serbisyo isip konsehal niadtong 1992, vice mayor, ug upat ka higayon nga congressperson.
Dugang pa niya, kung gusto nimong susihon ang mga kalamboan o ang mga proyekto sama sa bahin sa Laguna Lake Development Authority (LLDA), bukas ug welcome kaayo siya nga ipasusi kini aron makita ang tinuod nga kalamboan imbes nga sige ra og lalis.
