Gibasura sa Korte Suprema ang hiniusang mga petisyon nga nagkuwestiyon sa proseso nga gihimo sa House of Representatives Committee on Justice sa mga ‘impeachment complaints’ batok kang Bise Presidente Sara Duterte.
Sumala sa Korte Suprema, ang mga isyu nga gipatungha sa mga petisyon nahimo nang ‘moot’ o mahimong isipon nga dili na kinahanglan og resolusyon.
Matod nila nga naaprobahan na sa kamara ang Articles of Impeachment ug hingpit na kining napasa sa Senado nga karon mao na ang Impeachment Court.
Sa resolusyon nga gi-isyu sa Korte Suprema, gibasura niini ang managlahing petisyon nila ni Atty. Israelito Torreon ug Bise Presidente Duterte diin ilang gikuwestiyon ang ‘findings’ sa komite sa mga reklamo.
Gipasabot sa korte nga ang pagpadala sa Articles of Impeachment nagpasabot sa katapusan sa ‘impeachment process’ sa bahin sa House of Representatives.
Busa, bisan unsa nga desisyon ang himuon sa Korte Suprema sa ‘balido’ sa mga aksyon nga gihimo sa kamara dili makaapekto sa kontrobersiya.
