Nagpabilin nga lig-on ang baroganan sa human rights lawyer nga si Atty. Neri Colmenares bahin sa panubag ni Vice President Sara Duterte may kalabutan sa kontrobersyal nga paggamit sa confidential funds ug sa giatubang niining impeachment.
Sumala sa kanhi representante sa Bayan Muna, klaro ang paglapas sa balaod ug sa Saligang Batas bahin sa paggasto sa kapin ₱125 milyon nga pondo nga gigamit nga walay sapat nga linya sa badyet ug walay klarong opisyal nga resibo.
Gipasabot niya nga ang paggamit sa mga alyas o fake names sa mga resibo sa confidential funds dili gayud legal subay sa mga lagda sa Commission on Audit (COA), ug ang pagtugot niini kay usa ka delikado nga ehemplo nga pwedeng mag-abli sa pultahan sa kaylap nga pagpangawat sa kaban sa nasud.
Gipatin-aw usab ni Colmenares nga ang impeachment complaint nga ilang gipasaka base sa betrayal of public trust adunay bug-at ug lig-on nga ebidensya tungod kay ang sayop nga paggasto sa pondo sa katawhan kay direktang paglapas sa panumpa sa katungdanan sa usa ka pampublikong opisyal.
Matod niya, kinahanglang atubangon ug tubagon sa Bise Presidente ang mga alegasyon sa pagdungog sa Senado, tungod kay ang matag piso sa confidential fund kay pondo sa lungsod nga adunay katungod nga makahibalo kon giunsa kini paggasto sulod lamang sa pipila ka adlaw.
Gisugyot usab sa human rights lawyer nga dili na i-atras o i-langan pa ang proseso sa paglitis aron maipakita sa publiko ang hustisya ug ang matuod nga kahulogan ng pampublikong panubag.
