Nasakmit sa Alas Pilipinas Women ang labing unang silver medal sa nasod sa SEA V Cup human pildihon ang Indonesia, 25-13, 23-25, 25-19, 33-31, gahapon Domingo sa Thailand.
Human sa grabeng panagsangka nga miabot sa marathon nga fourth set, nakalahutay ang Alas Pilipinas sa walo ka set points sa Indonesia sa wala pa masilyohan ang ilang makasaysayanong kadaugan.
Nagtabla ang duha ka team sa 31-all sa wala pa mipatigbabaw ang Pilipinas sa ulahing bahin sa set.
Ang crucial block nila Fifi Sharma ug Jia de Guzman nakatabang sa pagpahunong sa opensiba sa Indonesia, sa wala pa masayop ang kaatbang sa ilang drop shot nga maoy naghatag sa Pilipinas sa makasaysayanong kadaugan.
Tungod niini, nalabwan sa Alas Pilipinas ang ilang unom ka bronze-medal finish sukad sa pagsugod sa torneyo niadtong 2019, nga kaniadto gitawag nga ASEAN Grand Prix, sa wala pa kini nahimong SEA V.League ug sa ulahi, SEA V Cup.
