Gikumpirma sa grupong Houthi nga ilang giatake gamit ang drone ang Jazan refinery sa Saudi Aramco sa Saudi Arabia niadtong Domingo, pipila ka adlaw human mipirma ang Saudi Arabia og defense pact uban sa Turkey ug Pakistan.
Sumala sa tigpamaba sa militar sa Houthi nga si Yahya Saree, target sa ilang drone ang refinery sa Jazan, habagatang-kasadpan sa Saudi Arabia.
Miingon ang Saudi Energy Ministry nga adunay sunog nga miulbo sa pasilidad apan dali ra kining napalong, ug walay gitaho nga mga nasamdan.
Gikumpirma usab sa Houthi ang pag-atake gamit ang missile ug drone sa Mocha, usa ka pantalan nga siyudad sa Yemen.
Dugang pa, nga basi sa report, gipusil sa air defenses ang mga drone nga giingong nagtarget sa commercial quay ug storage facilities sa pantalan.
Sa laing bahin, miingon ang usa ka opisyal sa Yemen nga pito ka tawo ang namatay ug dakong kadaot ang nahitabo sa imprastraktura sa pantalan.
Ang mga pag-atake nahitabo duha ka adlaw human mipirma ang Saudi Arabia, Turkey ug Pakistan og defense pact diin ang armadong pag-atake batok sa usa sa tulo ka nasod isipon nga pag-atake batok sa tanan.
Bisan pa niini, miingon ang Turkish Foreign Minister Hakan Fidan nga ang kasabutan dili gitumong batok sa Iran o bisan unsang piho nga nasod, kondili alang sa seguridad sa tulo ka mga kaalyado.
