Nanawagan si Senate Labor Committee Chair Joel Villanueva sa Department of Labor and Employment (DOLE) nga maghimo og temporaryong programa sa mga minimum wage earners samtang ang pagpatuman sa P85 nga pagtaas sa sweldo sa Metro Manila nagpadayon pa sa korte.
Sumala ni Villanueva, dili angay nga dugangan pa og pressure ang mga trabahante samtang giklaro pa ang mga legal nga isyu nga may kalabotan sa wage order, labi na sa padayon nga pagtaas sa presyo sa pagkaon ug krudo.
Gipasiugda sa senador nga ang mga trabahante nanginahanglan gayud og pagtaas sa sweldo tungod kay ang kasamtangang minimum wage dili na igo alang sa disenteng panginabuhi.
Sa samang higayon, gipahayag ni Villanueva ang suporta sa National Wages and Productivity Commission (NWPC) ug sa Regional Tripartite Wages and Productivity Board-NCR sa ilang hangyo alang sa angay nga mga remedyo gikan sa Office of the Solicitor General.
Gipasiugda niya nga ang tripartite wage-setting mechanism nga gihimo ubos sa Republic Act No. 6727 ang angay nga mopatigbabaw, imbes nga ang isyu sa pagtakda sa sweldo matapos sa taas nga proseso sa korte.
Sumala ni Villanueva, ang pagpataas sa sweldo kinahanglan nga i-negosasyon tali sa mga trabahante, management, ug gobyerno base sa aktuwal nga panginahanglan, ug dili angay nga malangan tungod sa mga kaso.
