Pormal nga gideklarar sa impeachment court si Gina Acosta, kanhi Special Disbursing Officer (SDO) sa Office of the Vice President (OVP), isip “hostile witness” karong adlawa.
Tungod niini, gipahibalo ni Presiding Officer Chiz Escudero nga mahimo nang mogamit si Private Prosecutor Atty. Amando Virgil Ligutan og “leading questions” sa iyang pagpangutana kang Acosta.
Samtang, nahimong init ang hearing dihang gisaway ni Senator-Judge Erwin Tulfo si Acosta ug giawhag siya nga mosulti sa Tagalog o English.
Matod ni Tulfo, nahinay ang pagpadayon sa husay tungod sa panginahanglan sa paghubad sa mga tubag ni Acosta gikan sa Visayan ngadto sa Tagalog ug English, human miingon ang saksi nga dili siya pamilyar sa maong mga pinulongan.
Gipakita usab ni Tulfo ang kopya sa opisyal nga transcript sa mga nangaging hearing sa House Committee on Good Governance aron ipakita nga nakasulti ug nakatubag si Acosta sa Tagalog.
